Dnja 13.01.2023 woli Zwjazkowe předsydstwo Domowiny serbskich zastupjerjow ze Sakskeje do Załožboweje rady za wólbnu dobu 2023 do 2027. Wólby wotměja so na zjawnym wurjadnym posedźenju Zwjazkoweho předsydstwa Domowiny w Serbskim domje w Budyšinje.
Po wustawkach Załožby za serbski lud § 5 wotstawk 2 dypk 1 přisłušeja Załožbowej radźe šěsć zastupjerjow serbskeho ludu, z kotrychž pomjenuja so štyrjo ze Swobodneho stata Sakska a dwaj z Kraja Braniborska. Kóždy z nich ma měć naměstnicu/naměstnika. W Braniborskej Rada za naležnosće Serbow zastupjerjow serbskeho ludu z kraja pomjenuje, w Sakskej je to nadawk Zwjazkoweho předsydstwa Domowiny.
Tuchwilna wólbna doba rady Załožby za serbski lud skónči so w měrcu 2023.
Dźesać kandidatow předstaji so Wam na tutym blogu. Tekst podamy originalnje kaž wot požadarja / požadarki zapodaty. Doba za zapodaće kandidaturow je so 30.11.2022 zakónčiła.
powołanje: wukubłana medicinsko-techniska asistentka za radiologiju
dźěłowe městno: asistentka za kliniske studije w priwatnym nadawkowym slědźenskim předewzaću w Drježdźanach
čłonstwo a funkcija w serbskich towarstwach:
wot lěta 2010 jednora čłonka towarstwa “stup dale” w Drježdźanach
wot lěta 2013 čłonka předsydstwa z funkciju pokładnicy w towarstwje “stup dale” w Drježdźanach
wosebite znajomosće a nazhonjenja na serbskim polu: Nazhonjenja na serbskim polu mam wosebje z kubłanjom mojich třoch dwurěčnych dźěći w němskorěčnej wokolinje a jeho ćeže a wužadanja.
motiwacija a wobsahowe ćežišća:
Česćeni čłonki a čłonojo Zwjazkoweho předsydstwa Domowiny,
z tym požadam so wo kandidaturu za wólby serbskich zastupjerjow ze Sakskeje do rady Załožby za serbski lud.
Po wuspěšnym zakónčenju realneje šule na serbskej srjedźnej šuli Ralbicy wjedźeše mje mój žiwjenski puć po wšelakich stacijach w Němskej do Drježdźan, hdźež so w lěće 1999 zasydlich. Tam narodźichu so moje tři dźěći do dwurěčneje swójby. Bě mi wažne, swojim dźěćom w němskorěčnym wobswěće móžnosć skićić, serbsku rěč a kulturu posrědkowanu dóstać. Spěšnje pytnych, kak ćežko je, dźěći w němskorěčnej wokolinje kubłać. Tuž přistupich w lěće 2010 serbskemu towarstwu “stup dale ”, ke kotrehož załoženskim čłonam słušam. Wot lěta 2013 sym čłonka předsydstwa towarstwa a mam funkciju pokładnicy.
Po mojim nawróće do łužiskeje domizny a ze stupacej samostatnosću mojich dźěći mam nětko čas, so při temje serbskich prašenjow přichoda angažować. Při tym sym wo tym přeswědčena, přez swoje dołholětne nazhonjenja při kubłanju mojich dwurěčnych dźěći zwonka Łužicy a mojeje towarstwoweje dźěławosće, serbski přichod pozitiwnje sobu wuhotować móc. Z tutymi nazhonjenjemi chcu rady při dźěle w radźe Załožby za serbski lud přinošować.
Moje ćežišća zajimow su:
serbske kubłanje zwonka Łužicy,
motiwacija za młodych Serbow, kubłanske powołanja přewzać,
konstruktiwne a kritiske zhladowanje / ewaluacija skutkownosće spěchowanskich naprawow, zo bychu so móhli tež w přichodźe spěchować koncepty, kotrež maja dobre wuhlady na wuspěch k zdźerženju serbskeje rěče a kultury
přepruwowanje załožboweho zarjada a struktury na jeje skutkownosć
zaměrna podpěra zwonka Łužicy bydlacych Serbowkow a Serbow
koncepty k podpěrje serbskeje kubłanskeje awtonomije
Čuju so wysoko motiwowana, so jako zastupjerka rady Załožby za serbski lud angažować.
SPD – krajny dźěłowy kruh „Serbja“: sobuzałožer,ko-rěčnik, zastupowanje serbskich naležnosćoww krajnej politice
čłon Serbskeho šulskeho towarstwa
dalše čestnohamtske dźěło serbskeho razu: Serbska bjesada ewangelskeje wosady Hodźij: sobuzałožer a sobuorganizator zetkanjow, zarjadowanjow, kemšow a hudźbneho wuhotowanja; Sobuzałožer a organizowanje lětneho interkulturelneho; „Swjedźeń zetkawanja“ w Budyšinje ze serbskim podźělom
wosebite znajomosće a nazhonjenja na serbskim polu:
Dobre a špatne nazhonjenja při rewitalizaciji serbskeje rěče, kultury a identity zwonka jadra sydlenskeho ruma a mjez nje-serbsce rěčacymi Serbami. Tutu perspektiwu mnohich nje-serbskorěčnych Serbow chcu wosebje sobu podpěrać.
motiwacija a wobsahowe ćežišća:
Česćene knjenje a česćeni knježa,
pódla sćelu Wam moje požadanje jako čłon załožboweje rady Załožby za serbski lud.
Wopodstatnjenje
Sym w mjeztym bohužel daloko němskorěčnym sydlenskim rumje žiwy a angažuju so tu intensiwnje wo wozrodźenje serbskeje kultury, rěče a identity. Rěč je drje w dwejoch abo třoch generacijow woteběrała, ale móžemy hišće na někotre kulturne zjawy nawjazać. Eksistuja wšak identitne korjenje, kotrež hodźa abo maja so zaso wožiwić jako móst k lěpšemu wozrodźenju kultury a rěče. Krok po kroku dźemy tutón puć.
Sym měnjenja, zo je jara wažne, tute stejišćo do załožboweje rady zapřijeć. Z oficialnych ličbow wuchadźejo, je to aktuelnje, historisce zawinjena, perspektiwa něhdźe dweju třećinow Serbow. Wot załožboweje rady podpěrane projekty a dźěło spěchowanych serbskich institucijow měli fokus sylnje tež na potrjeby tuteje skupiny wusměrić. Wězo runje tak wažne je mi podpěra jadrowych kónčin. Wobě, jadrowa kaž nakromna kónčina, matej so wzajomnje w swojich prócowanjach skrućić. Na to kładu w swojim dźěle kładu generelnje wosebitu wažnosć, tež w druhich serbskopolitiskich gremijach.
2019 – čłonka fachoweje přirady “Spartenübergreifende Projekte” při Załožbje za kulturu w Sakskej
wosebite znajomosće a nazhonjenja na serbskim polu: know how na polu kulturno-politiskich jednanjow we wšelakich gremijach; předstawy, kak móže so serbska kultura w přichodźe zmysłapołnje wuhotować a wuwiwać à nadawki wědomosće při tym
motiwacija a wobsahowe ćežišća:
Što je mje wosobinsce pohnuło, za załožbowu radu kandidować?
Sprawnje prajene sym hakle po rozmołwje z předsydu Domowiny chutnje wo kandidaturje za załožbowu radu rozmyslowała. A hačrunjež je so mi jeho próstwa wjeseliła, njeje mi rozsud za přewzaće tutoho nadawka lochko padnył. Běch dźesać lět čłonka Budyskeje měšćanskeje rady; tuž wěm, kelko wosobinskeho angažementa sebi tajki hamt žada. Wyše toho sym hižo w załožbowej radźe skutkowała. Smy před 15 lětami po dołhim diskusijam a krutym jednanjam rozsudy za strukturne změny w institucionelnej zestawje serbskeje kultury tworić dyrbjeli, kotrychž wuskutki poprawom hakle dźensa połnje widźeć su. Wšitke tute nazhonjenja wunuzuja mi wulki respekt. Sobudźěło w załožbowej radźe sej wjace žada hač přehladanje projektowych próstwow z krótkodobnym dosahom, zasadźenje za wosobinske koniki abo wjeselo na soburěčenju. Rozsudne za moju kandidaturu wšak su moje nazhonjenja jako čłonka Sakskeho kulturneho senata – gremija, kotryž spěchowansku politiku kraja a komunow za wuměłstwo a kulturu poradźujo přewodźa a wobsahowe ćežišća doporuči. Ze swojeho skutkowanja w tutym gremiju wěm, kak trěbny rozhladniwy a mudry diskurs wo přichodnym wuwiću serbskeje kultury a wo wužiwanju za to trěbnych financnych srědkow je. Při tworjenju tutoho diskursa chcu so ze swojej wědu – tež na polu parlamentariskich jednanjow – rady w załožbowej radźe angažować.
Wšelake we Łužicy skutkowace wobswětowe skupiny (Alle Dörfer bleiben, BUND, Ende Gelände): sobudźěło
wosebite znajomosće a nazhonjenja na serbskim polu: Před ca. 15 lětami sym započał, so intensiwnje ze serbskimi temami zaběrać. Sym rěčne kursy wopytał a započał, so w towarstwach a iniciatiwach angažować. Hdźež móžno, wužiwam překrywanja k swojemu sobudźěłu we wobswětoškitnych organizacijach.
Wot 2011 sym čłon Drježdźanskeho towarstwa Stup dale z.t. Tam pomham, zarjadowanja přihotować a – aktualnje – dźěćacu dnjowu skupinu zachować.
2018 sym wjednistwo prěnich wólbow Serbskeho sejma na so wzał. We wuběrkach Serbskeho sejma zaběram so intensiwnje z politiskej situaciju serbskeho ludu. Sym ko-awtor sćinoweje rozprawy wo połoženju serbskeho ludu wot 2021 (https://www.serbski-sejm.de/hs/dokumenty-hs.html).
W leće 2019 sym LAG „Serbske žiwjenje“ pola Z90/Zelenych sobu załožił. Tam sym na namjetach za wólbne programy a koaliciske jednanja sobu dźěłał a wólbny forum za wólby zwjazkoweho sejma sobu organizował.
Wot 2021 sym poradźowacy čłon w RBA, hdźež hódnoću projekty strukturneje změny we Łužicy.
motiwacija a wobsahowe ćežišća:
Česćene knjenje a česćeni knježa,
kandiduju za wuzwolenje serbskich zastupjerjow ze Sakskeje do Załožboweje rady. Naprašnik namakaće w přiłoze.
Sym we Wojerecach a wjesnej wokolinje bjez serbskorěčneho šulskeho kubłanja a pod zaćišćom zničenjow přez brunicowe jamy wotrostł. Serbski dźěl mojeje swójby njeje rěč zwjetša njewužiwał. Wot 1995 bydlu w Drježdźanach. Moja mandźelska je migrantka. Sym hobbyjowy hudźbnik. Přez swójbu, studiju, dźěło a hobby mam kontakt z ludźimi ze cyłeho swěta. Widźu so sam jako dźěl wšelakoreje towaršnosće, w kotrejž serbsku rěč a kulturu wažny podźěl ma. Chcu docpěć, zo so serbšćina samozrozumliwiša stanje.
Moja serbska identita wobsahuje slědowace perspektiwy:
rěč zhubił
domiznu zhubił
spytać, tute zhubjenja zaso napjelnić
Chcu załožbowu radu ze swojimi nazhonjenjemi jako urbaniski, njekatolski, do němčiny asimilowany Serb, kotryž na žanej serbskej instituciji njedźěła, wobohaćeć. Z nětčišim powoženjom serbskeho luda njejsym přezjednje. Z mojeho wida su sćěhowace wobłuki wosebje wažne za naš přichod:
wuměłstwa, wosebje subkultury, stimulować
zwiski ze słowjanskimi susodnymi krajemi skrućeć
serbsko rěčne kubłanje zwonka Łužicy zmóžnić
nutřkoserbski politiski diskurs zesylnić, demokratiju we Łužicy a w Serbach skrućeć a
polěpšić
kulturnu a kubłansku awtonomiju za serbski lud nabyć
cyłu demokratisku kontrolu budgeta zhotowić
W tutym zmysle chcu předewzaća załožby kritisce a konstruktiwnje přewodźeć a za trěbne změny wabić.
Rozłožuju moje stejišća rady na wosobinskim zetkanju.
powołanje: po studiju hospodarstwa a mjezynarodneho finančneho managementa podach so hač do decembra 2022 jako projektowy manager za IT do ličenskeho centruma w Awstriskej, wot měrca dźěłam jako businesowy analyst pola zawodoweho poradźowanja w Drježdźanach
dźěłowe městno: projektowy manager za IT pola ARZ – Allgemeines Rechenzentrum (nětko Tigital); wot měrca businesowy analyst pola CGI
čłonstwo a funkcija w serbskich towarstwach: něhdyši čłon Pawka, něhdyši čłon studentskeho towarstwa Bjarnat Krawc, něhdyši čłon a tuchwilny spěchowanski čłon studentskeho towarstwa Sorabija, tuchwilny čłon młodźinskeho kluba Radwor
dalše čestnohamtske dźěło serbskeho razu:
jako jedyn z dweju moderatorow podcasta „Serbski Buschfunk“ zaběram so kóždy tydźen w jednym wusyłanju z aktualnymi serbskimi temami a powěsćemi
w šulskim času běch dźiwadźelnik pola Młodźinskeho dźiwadła Serbskeho Gymnazija a čłon 1. Serbskeje kulturneje brigady
wosebite znajomosće a nazhonjenja na serbskim polu:
nazhonjenja we wjedźenju serbskich a dwurěčnych profilow w socialnych syćach kaž na přikład za Bjarnat Krawc, Sorabija Lipsk abo športowe towarstwo 1922 Radwor
nazhonjenja w přewjedźenju zarjadowanjow kaž Powerserb, Nócny wolejbul, Pokerserb a koparski turněr wo pokal Pawka
dołholětny čłon radija Satkule
motiwacija a wobsahowe ćežišća:
Lubi Domowinjenjo,
w přihotach na nowowólby do Załožboweje rady buch narěčany, hać nochcył snano kandidować. Hižo dlěje přemysluju, kak móžu so w přichodźe dale a bóle za serbski lud angažować a při tym swoje kmanosće intensiwnišo zasadźować. Tuž sym so w předpolu z nadawkami Załožboweje rady zaběrał a z něhdyšimi Załožbowymi radźićelemi, sobustawami Zwjazkoweho předsydstwa a dalšimi angažowanymi Serbami w serbskich institucijach rozmołwjał. Při tym so mi wuwědomi, kotre naroki so na Załožbowu radu stajeja, kak wobšěrne dźěło w tutym gremiju je a kajke móžnosće su, swójske ćežišća formulować a tutym zmysłapołnje slědować. Po chwilce přemyslowanja a wotwažowanja, sym spóznał, zo mje zamołwitosć a wobšěrne dźěło njewottraši, ale skerje wabi. Tohodla sym rozsudźił, zo za Radu Załožby za serbski lud kandiduju a zo – jeli so mi mandat spožči – rady w přichodnej legislaturnej periodźe na dobro serbskeho ludu swoje nazhonjenja a kompetency zasadźuju ale tež pohłubšu.
Swójske wobsahowe čežisća widźu w spěchowanju młodźinskeho dźěła a digitalizacije. Jako “starši” młodostny a něhdyši čłon serbskich studentskich towarstwow w Drježdźanach a w Lipsku sebi myslu, zo mam dobry přehlad wo zajimach młodźiny a dobry zwisk do młodźiny, štož so w dźěle jako radźićel zawěsće wupłaći. Na polu digitalizacije je so w minjenych lětach hižo wjele stało, a tola je mnohich móžnosćow a a kapacitow, kotrež so hišće wučerpali njesu. Dźěło něhdyšich radźićelow měło so tuž dale wjezć a pohłubšić. W nadźiji, zo směm k tomu přinošować, zo so dźěło něhdyšich radźićelow wobstajnje a pozitiwnje dale wjedźe, wobkruću tu hišće jónu moju kandidaturu.
předsydka wjesneho towarstwa “Při skale” w Hórkach
čłonka SŠT z.t.
dalše čestnohamtske dźěło serbskeho razu: zastupowaca čłonka Załožboweje rady z lěta 2013 (dwě periodźe), čłonka projektoweje přirady Załožby za serbski lud
wosebite znajomosće a nazhonjenja na serbskim polu: dobry zwisk k towarstwam a Domowinskim skupinam, wosebje w HŁ; dobry zwisk k serbskim staršim a młodostnym; přez swójsku dźěławosć kontakt do pěstowarnjow a šulow w HŁ a DŁ
motiwacija a wobsahowe ćežišća:
Chcu dźěławosć jako radźićelka, kotruž hižo z lěta 2015 wukonjam, směrodajnje dale wjesć. Widźu, zo sym z mojim dotalnym angažementom zhromadnu dźěławosć Domowiny a Załožby za serbski lud wobwliwowała.
Cyle wažne mi je, zo so tučasna spomóžna dźěławosć radźićelow dale wjedźe. Měnju, zo smy w poslednimaj periodomaj wjele pozitiwneho wuskutkowali, štož je dźěławosć radźićelow polěpšiło. Wězo smy wjele časa inwestowali, štož pak běše na dobro Serbow.
Přeju sebi, zo so tuta dźěławosć dale wjedźe, dokelž je skutkowanje w załožbowej radźe naročny nadawk.
předsyda towarstwa ZAHRODKA 1921 z.t. w Delnim Wujězdźe
čłon předsydstwa – “Uhyster Heimatverein”
motiwacija a wobsahowe ćežišća:
Sym 56 lět stary a mam jako zarjadniski hospodar powołanske nazhonjenja ze zlutniwym a skutkownym nałožowanjom dawkowych pjenjez za zjawne naležnosće. Zdobom so jako sobuzałožer a předsyda serbskeho towarstwa „Zahrodka 1921 z.t.” w Delnim Wujězdźe ze serbskim žiwjenjom na bazy wuznawam. Smy ze znowazałoženjom něhdyšeho tradicionelneho towarstwa nawjazujo na stawizny regionalny přinošk k byću a traću serbskeho ludu zdokonjeli, kotryž krok po kroku dale wuwiwamy. Wosebje wažne je nam wožiwjenje serbšćiny wšědny dźeń; hižo za čas pandemije smy z online-kursom z Marekom Krawcom, kiž tehdom hišće w Praze bydleše a mjeztym jako docent Rěčneho centruma WITAJ za dorosćenych dźěła, wuhibki do tutoho směra stajili.
Wot 1.11.2022 mam jako – sam hišće wuknjacy – motiwator Domowiny za rěč w mojej domiznje wožiwjenje maćeršćiny mojeho pradźěda na starosći, kiž je w lěće 1948 jako zapósłanc prěni Sakski serbski zakoń w krajnym sejmje wopodstatnił. Wěmy, zo je prěni tajki zakoń w Němskej za škit a spěchowanje serbskeje rěče a kultury na jednym boku wjele spomóžneho wuskutkował, na druhim boku pak tomu zadźěwał njeje, zo je so serbšćina tež w našich kónčinach we wšědnym žiwjenju zhubiła. Jako wjesny předstejićer angažuju so intensiwnje za to, zo naša starodostojna rěč takrjec z rowa stanje a zaso bytostny element našeho towaršnostneho žiwjenja budźe. K tomu słuša runohódna prezenca serbšćiny w samsnej wulkosći na wšěch pućnikach a taflach z mjenami wsow a drohow.
Wjele lět so hižo regionalnemu planowanju a pěstowanju stykow mjez wšelakimi regionami Łužicy wěnuju. Chcu swoje praktiske kompetency na polu komunalneje politiki a regionalnych perspektiwow do dźěławosće załožboweje rady sobu přinjesć. Sym komunikatiwny typ a so jara na wuměnu mjeze Serbowkami a Serbami z cyłeje Łužicy wjeselu. Myslu sej, zo mamy tuchwilu wulku historisku zamołwitosć, statne spěchowanje za wožiwjenje Serbstwa wosebje tež w brunicowych rewěrach tak efektiwnje kaž móžno nałožować, zo bychmy škody našeje narodneje substancy z doby wudobywanja brunicy wurunali a nowemu schadźenkej serbskeho žiwjenja wožiwić dać.
Předsydstwo župy „Handrij Zejler” je mje jako „fachowsce a komunikatiwnje kompetentneho sobuwuhotowarja procesow wuwića ramikowych wuměnjenjow serbskeho žiwjenja” za wólby do załožboweje rady namjetowało. Mi je pak wažne na to skedźbnić, zo njeje tajka kompetenca ryzy indiwiduelny wukon, ale wupłód zakótwjenosće we wjesnych strukturach a towaršnostnych cyłkach, w kotrychž su so ludźo na puć podali, rozmachej Serbstwa dopomhać. A wězo, kaž župa w swojim wopodstatnjenju piše, sym „zwólniwy, so w serbšćinje dale zaměrnje tak wukmanjeć”, zo bych „zhromadne dźěło z druhimi serbskimi załožbowymi radźićelemi tež jako rěčny rum pěstować móhł”.
dalše čestnohamtske dźěło serbskeho razu: Mam mnohe powołanske nazhonjenja na polu (serbskeje lajskeje) kultury, běch sobudźěłaćerka SLA a nawjazach kontakty přez cyłu Němsku, nimopowołansce studowach kulturny management a po tym hospodarstwo. Wot 2007 nawjeduju jako jednaćelka Zwjazk z 350 sobustawami a hač do 40 (tež čestnohamtsce) sobudźěłacych. Na zhromadne dźěło z politiku, serbskimi institucijemi, zjednoćenstwami a towarstwami sym přez wobšěrne nazhonjenja na krajnej a zwjazkowej runinje derje přihotowana a bych so wjeseliła, so z dźělom Załožboweje rady stać.
motiwacija a wobsahowe ćežišća:
Česćene knjenje a česćeni knježa,
sym dale zwólniwa, za wólby do Załožboweje rady kandidować. Jako dodawk k hižo připósłanemu naprašnikej dóstanjeće někotre dalše informacije k mojej motiwaciji a mojim wobsahowym ćežišćam.
Mje wuznamjenjeja mnohostronske powołanske nazhonjenja na polu kultury a kulturneho managementa. We Łužicy dobych přez wjele lět nazhonjenja w lajskej kulturje a wotpowědnym projektowym dźěle. Jako sobudźěłaćerka w SLA nawjazach kontakty po cyłej Němskej a zwonka njeje. Nimopowołansce studowach w tym času kulturny management.
W lěće 2003 dźěch swójbnych přičin dla do Erfurta a studowach tam hospodarstwo, připódla mějach dalše powołanske stacije. Wot lěta 2007 sem nawjeduju jako jednaćelka Zwjazk tworjacych wuměłcow Durinskeje, z 350 sobustawami a hač do 40 (tež čestnohamtskimi) sobudźěłaćerjemi. Moje ćežišća leža we wobłuku organizacije, zjawnostneho dźěła, wobdźěłanja spěchowanskich srědkow a přewjedźenju wjetšich kulturnych projektow.
Sćěhowach samozrozumliwje dale kulturne a politiske podawki w mojej domiznje, kotrež wostach skónčnje tež přez wulku swójbu přeco zwjazana. Steju dale za tym, zo je wažne, kulturne poselstwa k skrućenju našeje mjeńšiny dale njesć a zwonka Łužicy widźomne činić. Moja swójbna situacija dowola zaso sylnišo móžnosć, swój wobłuk dźěławosće tež zwonka Durinskeje rozšěrić, so ze swojej fachowej wědu čestnohamtsce angažować a tak na prjedawše dźěławosće we Łužicy nawjazać. Na zhromadne dźěło ze serbskimi institucijemi, politiku, zjednoćenstwami a towarstwami sym přez wobšěrne nazhonjenja na krajnej a zwjazkowej runinje derje přihotowana a móžu sebi předstajić, so z dźělom Załožboweje rady stać.
Spěchowanski kruh za serbsku ludowu kulturu (w předsydstwje)
Maćica Serbska
Zwjazk za serbski kulturny turizm
Serbski Sokoł
dalše čestnohamtske dźěło serbskeho razu: předsyda přihotowanskeho wuběrka za mjezynarodny folklorny festiwal “Łužica” a z tym zwisowace funkcije w CIOFF
motiwacija a wobsahowe ćežišća:
Hłowna motiwacija je situacija, zo nimale wšitcy dotalni serbscy radźićeljo hižo njekandiduja. Po tym zo su mje jednotliwcy a towarstwa kaž Kamjenska župa abo Zwjazk za serbski kulturny turizm na to narěčeli, hač njebych chcył ze swojimi nazhonjenjemi w nowej wólbnej dobje sobu skutkować, sym so za kandidaturu rozsudźił.
W slědowacych serbskich towarstwach sym z aktiwnym čłonom: Maćica Serbska, Zwjazk za serbski kulturny turizm, Spěchowansku kruh za serbsku ludowu kulturu, Serbski Sokoł, “Miłočanska žaba” z.t.. Regionalne wuwiće kónčiny Hornjołužiska hola a haty podpěram jako předsyda rozsudźaceho gremija za přesadźenje LEADER – strategije. Dale sym předsyda přihotowanskeho wuběrka za mjezynarodny folklorny festiwal “Łužica”. Dźěławosć Załožboweje rady je mi derje znata. Jónu běch jako naslědnik za wróćo stupjeneho čłona w čłon rady radźe, dwójce su mje do rady wuzwolili jako zastupowaceho a jako rjadneho čłona (2011-2015 a 2015 do 2019). Strukturu a dźěławosć załožby znaju z jeje załoženja 1991 a tohorunja sym dóstał dohlad do skutkowanja přisłušnych ministerstwow w Sakskej, Braniborskej a zwjazka. Wažne mi je, zo na jednej stronje spěchowane serbske institucije swoje nadawki widźa a spjelnja, zo tworja a skutkuja tak rjec jako fundament rěčneho a kulturneho wuwića w Serbach a zo so na druhej stronje inowaciski potencial projektoweje dźěławosće za serbsku rěč a kulturu wuwije a spěchuje.
Domowina 