dr. Hagen Domaška (47, z Drježdźan)

(originalny, wot požadarja zapodaty tekst)

čłonstwo a funkcija w serbskich towarstwach:

• Stup dale z.t.: jednory čłon
• Domowinska župa “Handrij Zejler”: jednory čłon

dalše čestnohamtske dźěło serbskeho razu:

• Serbski sejm: kooptowany čłon we wuběrkach za wustawu a prawo, kulturu a IT, něhdyši wólbny wjednik
• Regionalny přewodźacy wuběrk we łužiskim rewěrje (Regionaler Begleitausschuss): zastupowacy rěčnik wobswětowych zwjazkow
• Krajny dźěłowe kruh (Landesarbeitsgemeinschaft) „Serbske žiwjenje“ Zwjazka 90 / Zelenych: jednory čłon
• Wšelake we Łužicy skutkowace wobswětowe skupiny (Alle Dörfer bleiben, BUND, Ende Gelände): sobudźěło

wosebite znajomosće a nazhonjenja na serbskim polu: Před ca. 15 lětami sym započał, so intensiwnje ze serbskimi temami zaběrać. Sym rěčne kursy wopytał a započał, so w towarstwach a iniciatiwach angažować. Hdźež móžno, wužiwam překrywanja k swojemu sobudźěłu we wobswětoškitnych organizacijach.

Wot 2011 sym čłon Drježdźanskeho towarstwa Stup dale z.t. Tam pomham, zarjadowanja přihotować a – aktualnje – dźěćacu dnjowu skupinu zachować.

2018 sym wjednistwo prěnich wólbow Serbskeho sejma na so wzał. We wuběrkach Serbskeho sejma zaběram so intensiwnje z politiskej situaciju serbskeho ludu. Sym ko-awtor sćinoweje rozprawy wo połoženju serbskeho ludu wot 2021 (https://www.serbski-sejm.de/hs/dokumenty-hs.html).

W leće 2019 sym LAG „Serbske žiwjenje“ pola Z90/Zelenych sobu załožił. Tam sym na namjetach za wólbne programy a koaliciske jednanja sobu dźěłał a wólbny forum za wólby zwjazkoweho sejma sobu organizował.

Wot 2021 sym poradźowacy čłon w RBA, hdźež hódnoću projekty strukturneje změny we Łužicy.

motiwacija a wobsahowe ćežišća:

Česćene knjenje a česćeni knježa,

kandiduju za wuzwolenje serbskich zastupjerjow ze Sakskeje do Załožboweje rady. Naprašnik namakaće w přiłoze.

Sym we Wojerecach a wjesnej wokolinje bjez serbskorěčneho šulskeho kubłanja a pod zaćišćom zničenjow přez brunicowe jamy wotrostł. Serbski dźěl mojeje swójby njeje rěč zwjetša njewužiwał. Wot 1995 bydlu w Drježdźanach. Moja mandźelska je migrantka. Sym hobbyjowy hudźbnik. Přez swójbu, studiju, dźěło a hobby mam kontakt z ludźimi ze cyłeho swěta. Widźu so sam jako dźěl wšelakoreje towaršnosće, w kotrejž serbsku rěč a kulturu wažny podźěl ma. Chcu docpěć, zo so serbšćina samozrozumliwiša stanje.

Moja serbska identita wobsahuje slědowace perspektiwy:

• rěč zhubił
• domiznu zhubił
• spytać, tute zhubjenja zaso napjelnić

Chcu załožbowu radu ze swojimi nazhonjenjemi jako urbaniski, njekatolski, do němčiny asimilowany Serb, kotryž na žanej serbskej instituciji njedźěła, wobohaćeć. Z nětčišim powoženjom serbskeho luda njejsym přezjednje. Z mojeho wida su sćěhowace wobłuki wosebje wažne za naš přichod:

• wuměłstwa, wosebje subkultury, stimulować
• zwiski ze słowjanskimi susodnymi krajemi skrućeć
• serbsko rěčne kubłanje zwonka Łužicy zmóžnić
• nutřkoserbski politiski diskurs zesylnić, demokratiju we Łužicy a w Serbach skrućeć a
• polěpšić
• kulturnu a kubłansku awtonomiju za serbski lud nabyć
• cyłu demokratisku kontrolu budgeta zhotowić

W tutym zmysle chcu předewzaća załožby kritisce a konstruktiwnje přewodźeć a za trěbne změny wabić.

Rozłožuju moje stejišća rady na wosobinskim zetkanju.

Hagen Domaška