Předhru prěnjeho wuradźowanja noweho zwjazkoweho předsydstwa (ZP) ma fotograf Jurij Helgest w horšći, kiž sobotu rano takrjec oficielne foto jednotliwych čłonow gremija sčini. Połojca ZP su čłonojo, kotřiž poslednju legislaturnu periodu hišće nutřka njeběchu. Mjez nimi je wjele młodych wobličow.

Najprjedy móža so woleni mjez sobu přestajić, potom su sobudźěłaćerjo zarjada na rjedźe, doniž čestnohamtscy dohład wo konkretnych prawniskich, organizatoriskich a wobsahowych zakładach swojeje dźěławosće njedóstanu. Wolić maja sobotu čłonow mytowanskeho wuběrka Domowiny za dobu 2021-2025 z namjetow župow a čłonskich towarstwow/zwjazkow. Tež namjet za powołanje třoch zastupjerjow serbskeho ludu do Poradźowaceho wuběrka za prašenja serbskeho ludu poboku Zwjazkoweho ministerstwa nutřkowneho steji na dnjowym porjedźe.

Kedźbujće prošu: Z aktualnych přičin – list ze stron MDR Domowinje – leži dalši namjet za wobzamknjenje na blidźe, kiž rjaduje puć hač do wólbow Serbowki/Serba do rozhłosoweje rady MDR. Wobsadźenje serbskeho městna změje ZP w septembrje na starosći.  

LIVESTREAM NA (54) konstituowace posedźenje Zwjazkoweho předsydstwa Domowiny – YouTube SOBOTU, 19.6., 9-12 HODŹ.