Sym Wito Bejmak, Radworčan, Serb, woženjeny, nan 3 třoch synow, diplomowy informatikar a master w informaciskich wědomosćach, z 25-lětnym skutkowanjom jako IT-poradźowar w tu- a wukraju, a nětko nawoda Serbskeje centralneje biblioteki a Serbskeho kulturneho archiwa při Serbskim instituće; něhdyši sobustaw Lózych hólcow,  wot spočatka pódla na polu digitalizacije za serbsku rěč a ko-předsyda Radworskeje staršiskeje iniciatiwy.

Kandiduju, dokelž chcu z mojej powołanskej ekspertizu, nazhonjenjemi, wašnjom a z mojimi idejemi zwjazkowe předsydstwo zesylnjeć. Nětko w času strukturneje změny staja so wuhibki za perspektiwu dorosćaceje generacije we Łužicy – moderneje, kubłaneje, digitalneje, serbskeje Łužicy. Postarajmy so ze zwjazkarjemi, zhromadnje atraktiwitu posrědkowanja a wužiwanja serbšćiny zwyšić, z nowymi idejemi barjeru přistupa k serbšćiny znižić a wosebje so masiwnje digitalnemu kubłanju dźěći, dorosćenych/wučerjow wěnować.