Ja sym Diana Wowčerjowa, 46 lět stara, mać třoch dźěći a bydlu w Nuknicy. Rady jězdźu na dźěło do Radworja. Tam dźěłam jako wučerka za stawizny a towaršnowědu na wyšej šuli „dr. Marja Grólmusec”. Runje tak rady angažuju so jako županka župy „Michał Hórnik” a w předsydstwje SŠT. Wurunanje namakam při spěwanju w Radworskim chórje „Meja”.

Kandiduju za zwjazkowe předsydstwo, dokelž chcu sobu k tomu přinošować, zo so zakłady za wuknjenje a nałožowanje serbskeje rěče, hajenje serbskeje kultury a sposrědkowanje wědy wo Serbach, wosebje na našich serbskich kubłanišćach, rozšěrjeja, polěpšeja a/abo skrućeja. Runja k tomu chcu z přikładom być při spěchowanju tolerantneje towaršliwosće mjez Serbami a Němcami.