Dźensa dopołdnja (9-11 hodź.) so zarjadniske wjednistwo a wječor (17-22 hodź.) prezidij Domowiny dale z přihotami na hłownu a wólbnu zhromadźiznu třěšneho zwjazka Łužiskich Serbow zaběratej. Posedźeni so jako widejo-konferenca wotmějetej.

Prezidij so tež mjez druhim stawej nastajenja delegatow a kandidatow za nowowólby organow Domowiny wěnuje. Dalšej temje stej na přikład wólbne kopolaki za wólby zwjazkoweho sejma a přihoty na posedźenje poradźowaceho wuběrka za prašenja serbskeho ludu poboku Zwjazkoweho ministerstwa nutřkowneho, kotrež je na 22.6.2021 přestorčeny. Wuradźowanje gremija budźe digitalne, a prěni raz so serbskaj młodostnaj nimo zastupjerjow Domowiny a Załožby za serbski lud na posedźenju wobdźělitaj.

Wo dźensnišim posedźenju prezidija so bjezposrědnje po terminje nowinska zdźělenka wozjewi. Jeli hišće njejsy w našim rozdźělowaku aktualnych wozjewjenjow, móžeš so hnydom přizjewić: presse(at)domowina.de

Přidatne informacije wo zestawje horjeka mjenowaneju Domowinskeju gremijow: Do zarjadniskeho wjednistwa słušeja jednaćelstwo, referenća, nawodnica RCW; předsyda so na wuradźowanjach prawidłownje wobdźěla. Čłonojo prezidija z wothłosowanskim prawom su předsyda, městopředsydaj z Delnjeje a Hornjeje Łužicy a zastupjerjej zwjazkoweho předsydstwa (ZP), kotrejuž je ZP na namjet předsydy powołało. Poradźowacy sobuskutkowacy su jednaćel, zastupowacy jednaćel, referent za nutřkowne naležnosće, referent za zjawnostne dźěło, nawodnica RCW a zastupjer wotnožki RCW w Chóśebuzu.